Startseite

Vorwort

Lektionen

Wörterbuch

Grammatik

Bekannte Wörter

Plattdeutsche Ecken

Lippische Lieder

Lippische Sprüche

Autoren

Links

Impressum
und Datenschutz

 

Keun Sunndag eohne Pickert von August Wiemann

Text anhören hier            Text zum Ausdruck hier

Wat'n aulen Lipper es, de kann sick keunen Sunndag eohne Pickert denken. Pickert hoiert teo'n Sunndage os de Kuckuck teon Freohjohrswaule un os de Brui'm teo 'er Briut. Büi us in Hörste word et Sunnobends männichmol düget late. Wui hadden 'en grauten Hiusholt un vell Minsken an'n Diske. Wüi hadden Gor'n un Lännerüie vör'n Dörpe, hadden Schwüine un Siegens in'n Stalle un et drofte nich Foierobend wer'n bet olles blitzeblank was. Öbber wenn et nau seo late word, de Pickert moßte auk nau anmenget, backen un probeuert  wer'n, euher kreig us keuner int Bedde.

In'er Obendtuit gaf et daumols oll mol dat öberbliebene Middageten, öbber dat rechte Nachtmohl kam doch eurst noher, seo ümme Klocke elwe eoder twälwe, wenn de Modder ühr'n Berg Pickert fer'g hadde. jo, et was jümmer 'n richtigen Berg van 'n Stücker twälwe upeunanner, graute iutwossene Pickerts, jeuder'n Ver'l Disk graut. Doteo gaf et teo'n Upschmer'n soiten Roiwensapp iut'er Loge, eoder Schwetskensapp iut eugenen Kettel, eoder witte Bottern iut´n eugenen Fatt, eoder Lewwerwost van´n eugenen Schwüin. Un wat wüi dann up den Mohltüit geot schleupen, leuwet keun Minske.

Den ganzen Sunndag word auk keun Stücke Braut anpackt. Dat schmecke dann eunfach nich un passe nich in de Welt. Un wat de Mondagmor'n was, doför hadde de Modder auk nau'n Stücke Pickert för jeuden upheget. Dann word eunen de Anfang van'er Olldagswieken nich seo siuer.

Seo ging dat johrin un johriut. Auk an den haugen Festdagen, an Wüihnachten, Austern und Pingsten, wenn't hiusbacken Stiuten teon Satteten gaf, word de Pickert nich vergetten un veracht't. Süine Kulör was an den Festdagen ollerdings gäller os süß, heu hadde auk mahr Luftlöcker un männichmol schwarte Korinthen os Augen.

Eck mot söggen, de Pickert es us jümmer geot bekumen, wenn heu af un dann auk mol wirke os Rizinusölje un Rharbarberpillen. Seowat hölt frisk un risk un euner kann'er ault büi wer'n. Jo, eck lote nicks up geo'en lippsken Pickert kumen; wer den nich mag, de kennt'n nich, eoder heu weut nich, wat geot schmeckt.

Dat Rezept es nich van'n Doktor schrieben, öbber van echten lippsken Friuens, de Diusende van Pickerts back't  hä't. Un geot sind seu jümmer wesen, dat kann eck betuigen, eck meune de Friuens un de Pickerts.

Zur Lektion 6 gehören noch:
Pickert un Hespenhaken hier
Keun Sunndag eohne Pickert hier
Gedicht und Lied: Pickertsafari hier
Lied: Os eck nao´ne Jumfer was hier

Platt

Hochdeutsch

Austern

Ostern

betuigen

bezeugen

Braut

Brot

Briut

Braut

Bruime

Bräutigam

düget

tüchtig

Fatt

Fass

Freohjohrswaule

Frühjahrswohl

gäll

gelb

hoiern

gehören

iutwossen

ausgewachsen

Kettel

Kessel

Kulör

Farbe

läuwen

glauben

Middageten

Mittagessen

Ölje

Öl

risk

aufrecht

schleupen

geschlafen

Ver´l

Viertel

pickertbacken_jpg